减15磅同高圆圆谈情 谢霆锋不抗拒再婚

为了拍爱情片，操到好Fit同高圆圆演对手戏

　　谢霆锋早前与大陆女星高圆圆合作拍摄英皇电影《一生一世》，甚少拍摄纯爱片的他直言是新尝试，事前更秘密练兵操Fit体能迎战圆圆：「戏中唔止一场接吻戏，仲要除上衣拍，都要地狱式节食加运动，最终减咗十五磅。（担心喺圆圆面前失威？）唔系，角色讲我要搬搬抬抬，唔应该好食好住咁多肉，初头以为拍爱情片轻松过动作片，点知仲心力交瘁！拍动作片受皮外伤都好快可以康复！」

　　霆锋拍动作片非常出色，问会否想凭爱情电影做出成绩？他表示没有想过得奖，只觉是时间尝试：「有个因素系有得去纽约，我去咗一至两个星期，系冻咗啲！」而在纽约之旅主力拍摄与圆圆在街头久别重逢的镜头：「当时佢要喊，自己都冻到鼻涕两行直流，佢仲要流眼泪，点知佢啲眼泪同鼻水一出就变冰咁济！冻到块面僵晒赤住痛，我戥佢辛苦，但大街大巷没得避，我都唔知点帮佢！」

　　唔信自己系笋盘

　　贵为影帝又是制作公司老闆的霆锋经历过离婚，现为两子之父的他可谓饱历沧桑，谈及如何看待「一生一世」，他说：「我信嘅！不过可能喺十年前、年纪再细啲，嗰一生一世可能系揽住同佔有，依家啲一生一世系离远咁支持同祝福，唔知再十年后会点呢？依家学识放软啲去做，唔系佔有晒。（婚姻系一生一世？）结得婚都系嘅，但我唔抗拒亦唔强求。（再婚？）唔知，随缘啦！（大家话你系笋盘喎！）唉！唔信！」