拉姑称不是锋芝婚变黑手 放料人是谢霆锋？

因锋芝婚变硬撑了60多天的狄波拉，为了儿子谢霆锋一直含冤受屈，当她想起两个宝贝孙将来何去何从，恍如万箭穿心，每晚要食3粒安眠药才能入睡，已达崩溃临界点，拉姑慨叹锋芝缘分已尽，无人能救！现在霆锋返港照顾儿子，昨日，拉姑认为自己可以安心走了，不插手两人婚姻

一直在背后默默支持儿子的拉姑，待霆锋返港处理家事后，她于前晚开腔接受本报专访，剖白她跟霆锋的母子情，跟栢芝的婆媳关係，还有对3个多月未见一面孙儿的牵挂，身心俱疲的她，昨日跟老公鬍鬚Kong飞新加坡检查身体，不插手干涉儿媳婚姻。

记：记者　　　拉姑：狄波拉

霆锋顶唔顺投奔阿妈

（锋芝5年婚姻走到尽头，拉姑亲口道出两人婚变内幕，缘尽冇人救得到！）

记：对锋芝婚姻仲有冇期望？

拉姑（平和地）：我都冇参与，唔係知好多嘢，我成日以为霆锋唔出声就有得掹，后来才知有律师搞，之前佢哋爆咗单大镬嘢，当日佢两个闹交嘈得好犀利，栢芝揸车出去，点知发生交通意外撞到阿伯，后来阿仔嚟咗我屋企，我同佢讲：「阿仔，你要返屋企。」霆锋话：「我真係顶唔顺，如果我返屋企，顶唔到真係要返嚟。」我话：「你再嚟都要返屋企。」

（叹气）呢啲係天意安排，甚至栢芝揸车撞到人，呢啲就係天意，个天要stop你，到咁地步我都冇办法，惟有顺应天意，佢哋两个成年人，我唔会干涉、参与，缘尽冇人救得到，但可以处理得好，佢两个一个係我仔，一个係我新抱，有父就有母，希望佢哋健康环境快乐生活。

拉姑边行边看本报有关锋芝新闻，可见十分关心两人。
 
放开怀抱的拉姑，与丈夫同赴新加坡检查身体，趁机轻鬆一下。

 

对于锋芝婚变，拉姑不禁叹天意难违，缘尽难以挽救。

想见乖孙事先申请

（Lucas和Quintus是拉姑的心头肉，但原来拉姑想见两个孙，却要向「人」申请！）

记：几耐冇见一对孙？

拉姑（语气沉痛）：4月到依家冇见过，阿嫲同孙玩、过生日，都要申请，打电话问可唔可以同孙（Quintus）做生日？当时知道霆锋同栢芝关係闹得好差，阿仔话迟吓先，或者等佢哋大个啲先！唉！或者到时我唔知死咗未？

记：有报道Lucas 8月读书？

拉姑：我乜都唔知架，不过佢哋有需要就透过司机、工人，话畀我知佢哋需要乜嘢，我唔觉呢样唔好，唔会谂你哋有事锺无艳，我会谂几好喎，我都有啲用。

记：点解唔跟仔仔去阳明山庄见孙？

拉姑：我觉得唔好好似配合你哋写嘅画面，话我同霆锋去抢仔，唔好用个抢字，话我係幕后黑手，黑乜嘢手？我觉得我嗰隻同情心嘅手，边个埋嚟都觉得温暖，我连佢搬屋都唔知，4月孙嚟我屋企，我话夜啦走啦，你哋住好远，点知宾妹话依家住得好近，5分钟车程，咁我先知。

拉姑从不干涉栢芝的生活，婆媳本来就没有拗撬。
 
 

从不干预新抱天地

（当年锋芝瞒住拉姑结婚，一直有传拉姑唔锺意栢芝，拉姑澄清从来冇跟栢芝吵架，亦从冇差隻脚踩入新抱的天地。）

记：几耐冇见栢芝？

拉姑（提高声线）：哗！耐囉！大家都知佢呢半年特别忙啦，唉！佢哋两个大人嚟，忙架嘛，点解要佢哋得閒嚟报到、斟茶做乜嘢，好多嘢都係出面街外人话我知，你个孙又去咗北京，咁样囉。

Lucas几个月嘅时候，啲人话我孙好得意，可唔可以畀啲孙相，我话问佢妈咪攞，嗰个唔係我财产，所以我唔会去佢哋屋企架，因为我觉得係新抱嘅天地，每一个女主人都有每一个女主人嘅方法，我以为我咁做係啱嘅，留番个天下畀佢，不过婆媳、婆媳个个都话难做架啦，我从来冇同佢拗撬过，从来都冇，只有佢话：「唔好意思奶奶，打亲畀你都係有事。」我就会答：「唔紧要唔紧要，你讲啦新抱仔，你讲得到我就一定做到。」

爱儿回归　放心离港

（拉姑只有霆锋一个儿子，爱子情深的她一直在背后默默支持，宁愿自己受委屈都不想为霆锋添烦乱。）

记：霆锋返嚟有冇见面？

拉姑：我哋大件事才联络，霆锋昨日返嚟打畀我，我同佢讲：「你落飞机，阿妈要走啦，妈咪喺度会添烦添乱，有更多谣传，点解我8号唔走，阿妈知道8号机场好多记者，阿妈怕喺机场碰到你、碰到你太太，外间会有传言，以为我有份参与，咁会令你哋好麻烦。

我话你听，做仔唔会成日嗲阿妈，佢16岁入行，出入都有几十人跟佢，我做妈咪留喺仔后面，每有大镬嘢发生就一齐面对，我10几年冇去佢屋企，因为咁，新抱、外边人以为我哋关係有问题。

记：你对霆锋有乜寄语？

拉姑（感慨）：佢生命中有好多个关，呢个关唔止係佢，仲有佢太太，有佢两个仔，要负起做人应该要负嘅责任，唔係人哋话我係幕后黑手去插手，根本唔係，霆锋係最COOL，讲乜都唔会听，佢有自己一套。

内心滴血 「滥药」难眠

（惊爆锋芝婚变后，外间不实传言指拉姑放料插新抱，哑子吃黄连的拉姑，每晚要食3粒安眠药才能入睡，眼泪心里流，但访问好平和、冷静，冇喊。）　

记：依家心情点？

拉姑（痛苦）：前排心情麻麻哋，因为啲嘢突如其来，自己好震惊，依家我选择离开香港，我真係需要瞓觉，呢几个月身体愈嚟愈差，以前一粒安眠药可以瞓一晚，依家3小时要食一粒，日日坐车出去都转三次车避记者。

我需要休息，唔好再畀人觉得我係背后黑手、放料，我呢个阿妈，连佢请边个律师我都唔知，我冇见个仔，唔会参与搵边个律师、係咪离婚，亦冇去过马来西亚，我啲眼泪流乾咗，阿仔返嚟我安乐，唔使再挂心。

记：外间对锋芝婚变跌眼镜，慾照事件咁大难关都可跨过，但机舱自拍却引爆婚变导火线？

拉姑（慨叹）：真係谂唔到，其实呢件事比当初难关算乜风波，儘管我饱受好多委屈，但有时都安慰，有日同老公去食麵，有几位客人同我打招呼：「拉姑，撑住冇事，你有两个孙。」令我感动到喊。